Ялгыз яшәүче әби-бабайларга ярдәм бик кирәк шул. Кайбер йорт эшләрен эшли алсалар да, җылы сүз, якты карашка да мохтаҗ алар. Тимурчылар әлеге бушлыкны тулыландырып торучы шәфкатьлелек отрядлары. Алар ел әйләнәсендә ялгыз әби-бабаларга төрле эшләр башкаралар.
Быелгы кыш карга бик мул. 9 декабрь көнне 11 класс укучылары ялгыз яшәүче Сәрби  әбигә булыштылар: кар чистарттылар, сукмаклар ачтылар, түбәдән кар төшерделәр. Сәрби әби балаларга изге теләкләрен теләде. Балаларның йөзләрендә зур канәгатьлелек хисләре балкыды. Аларның изгелекләре аяк астында калмас, Аллаһы Тәгалә меңе белән кайтарыр.